Op zaterdag 25 januari 2014 werd bekend dat Ruud Welles (Prins Ruud I) de nieuwe Hoogheid van de Keieschiéters geworden was.
Hij werd bijgestaan door zijn dansmarietje Nena (Dinnissen).

PROKLAMASIE

Weej, Prins Ruud d'n Örste,
Beej de grasie vân de Raod vân Ellef.
Prins vân Ârce, zônder die vân Lômm en Vélde.
Groëtvors in de Orde vân d'n Ârcese Kei.
Kommandeur in de Orde vân d'n Hoephap.
Beschaeremhiër vân 't zwakke geslâch vân de Moeraskwakers oét ‘t Ven.
Keurvors in 't dreije vân beton beej unne Piëlhaas in Venroij.
Ridder in de Orde vân de Kaerikstraot en 'n stukske vân de Steeg.
Goeverneur in 't gaeve vân lange bäl zôndigs ‘smaerges beej 't Verd vân DEV.
Maarschalk vân vrindegroep “de Oétsmiéters”.
Zoën vân Hay oét ’t land vân de Worteleschrabbers oét d’n Bookend en Truus vân de Kook oét Baolder.
Biëstig grötse pap vân de Kiezelstiëntjes Maartje, Lieke en Wout.

Alzoë weej in ovverwaeging genaome hebbende, dât 't dinstig is um verordeninge te treffe in 't belang vân ôs ônderdane, gelet ôp artikel ellef vân 't vastenaovesriggelemént, verordene weej en doon te wiëte,

Ten örste: Dât ik âs lid vân de ôptochkemissie dit jaor neet nevve d’n optoch loëp, mâ hoëg vanoét unne splinterni-je Prinsewaage d’r ôp toe kân zeen of alles gladjes verlöp.

Ten twedde: Dât miene karnevalsgroep ziene naam waor meug make en ze dit jaor mit aswoensdig ok ech keiheis zien !!

Ten derde: Dât ’t Scrooge festival alwèr ’n suksés waor. Biëstig völ minse in 'n prachtige ambiánse, dao kunne ze in Venlo mit eur "kerstmaert" nag wât vân liére.

Ten verde: Dât we dit jaor nao hiël völ jaor gen ni-je schlagers hebbe, deut toch wâl 'n bietje pien. Waen is d’r neet mei ôpgegraöjd, mit die Ârcese liedjes, kôm ôp Ârce …… laote we dit stukske kultuur zoëmâr verdwiéne ??

Ten viefde: Dât ik de bewoëners vân de Waag ok oétnuuëdig um te kômme krénse. Kân ik die tenminste ôk unne kiër vraoge te kômme babysitte âs ik mit de karneval wer de hort ôp bin….

Ten zesde: Dât de Ârce Encyclopedie ’n moeëj naoslaagwaerik is, alliën jaomer dât de Heemkunde 't verschil ni wet tusse de Alde en de Jông Gild….

Ten zivvende: Dât binnekort wer geminteraodsverkiezinge zien, mâ vörluuëpig voert 't gael-blauw vân de Keieschiéters d'n baovetoën bovve de roeëje , greune en oranje kleure vân de politieke partieje.

Ten achtste: Dât ik alle aldere oétnuuëdig um naor ’t ni-je ivvenement "Zing vân Arcen en de kei" te kômme ôp de zôndigmiddig in dizze zaal. Vastenaovend is tenslotte vör jông EN ald…..

Ten niggende: Dât de Raod vân elluf mich de kômmende waeke meug kômme haelepe mit verbouwe, anders haal ik mienen “dédlain” neet en meug ik vân mien vrouw misschien wâl gaar ni ôp paad mit Vastenaovend.

Ten tiende: Dât 't toeristetreintje miër zônder âs mit passazjiers haet rôndgereeje. Laote we haope dât 't fiets/voot vaerpôntje 't drukker krieg, ánders leet dât gaeld ôk wer letterlik ôp d'n baojum vân de Maas….

Ten ellefde: Dât ik d’r same mit dansmarietje Nena, en alles um ôs hin, vör zörrig dât 't heej mit Vastenaovend 'n knalfiës giët waere, wao Ârce gröts ôp kân zien !!

Aldus gegaeve te Ârce, Vastenaovend 2014,

Prins Ruud d'n Örste.