Karnevalsvereniging 'De Keieschiéters'. Woej 't begoos.

Nao völ veurbereidende gesprekke, waerikzaamheden en afspraoke ônder leiding vân Jan Smits, Wiel Peters en Piet Reutelingsperger kwaome ôp unne zôndiggemaerge, in november 1950, nao de Hoogmis 'n flink aantal Ârcese kèls same in de zaal van Hotel-Café-Restaurant Peters (De Smoes) um de planne tot 't oprichte van 'n Karnevalsvereniging in Arce te verwezelikke. Vân de aanwezige zei 'n 15-tal persoëne eur daadwaerkelikke steun toe en 'n grötter aantal zien morele en finansjele steun, waorônder 'n 5-tal bekende Karnevalsvierders oét daen tiéd, veriéuwigd óp ônderstaonde foto.

Vân raéchs nao links zien dât: G. Schraven, direkteur van de Brouwereej: " De Vriendenkring". Jac. van Dijck, bookhalder vân de brouwereej. Frans van den Kamp, Wethalder en hólthandelaar. Giel Roncken, veurzitter van R.K.D.E.V. en de Hermenie. Pietje Stoffels, hállefbroor vân de wethalder.

Door de mínse die daor waore woord âs bestuur aangeweze: Jan Smits, Veurzitter (d'n dieke van Smits) en verteggenwaordiger vân "de Vriendenkring", Frans Nuchelmans - Sikkretaris – kantoër-bedinde "de Vriendenkring". Piet Reutelingsperger Penningmeister (Piet vân Kries) Wiel Peters lid (Wiel vân de Smoes) Piet van Rijswijck, lid (de Frietkeuning).

Verder woorde benumt unne Vorst mit Raod vân Ellef waorbeej d'r vanoét woord gegaon dât iedere straot of buurt daorin verteggenwaordigd waor. De samenstelling waor zoë: Jan Smits Vorst en in de Raod zoote: Piet Ottenheym, Piet van Heesch, Piet Reutelingsperger, Jeu Craenmehr, Wiel Muyres, Piet Hegger, Hay Clevers, Sef Kuypers, Thei Beeker, Frans Nuchelmans en Baer Coenders. In biezôndere dinst woord genumt: Kareltje van Rijswijck âs Hofkliërmaker.

Beej dit alles koos de vereniging raekene ôp 'n geldelijke beejdrage vân 7 x f 25,- vân de plâtselikke Kefeehalders te wiëte Jan Berghs, Sjeng Kox, Grada Crevels-Timmermans, Wiel Peters, Piet van Rijswijck, Frans Rayer en zaal Palmen.

Prins Ernst I in 't beruchte 'zwiëtkaemerke' (1963)

De örste doelstelling waor 't passend aantrekke vân de Raod van Ellef. Heerbeej veel de keus ôp roëd/zwarte korte jeskes, te make door d'n hofkliërmaker. De leeje mooste zellef zörrige vör 'n zwarte bôks. De mutse, ôk zwart/roëd woorde gemâk door Juul van Rijswijck, dochter vân Piet en nów getrouwd mit Jeu Braem oét Lottum.

De twedde doelstelling waor 't organizere en laote trekke vân unnen ôptoch door de straote vân Ârce waorbeej d'r vanoét woord gegaon dât ieder lid vân de Raod van Ellef in zien buurt of straot d'r vör zorrigde dât d'r mínse mej zujjen doon. Natuurlik waore vörál de finansjele moeilikheeje hiél groét en kooste de wagebouwers neet raekene ôp 'n geldelikke beejdrage vân de vereniging zoë-âs nów. Zeej moosten 't doon mit de ôpbrengs vân 'n kollekte, in eur eige straot of buurt. Mâr d'n ôptoch kwaom d'r, muzikaal begeleid door de Keuninklikke Hermenie.

De örste jaore van 't bestaon woord d'r nag genne Prins Karneval oétgerópe, dit waor 'n latere doelstelling. Wâl woord d'r ôp Vastenaovesdinsdig 'n oétgebreide Boorebrullef georganiseerd mit broed en broédegôm, vân beis kante de elders en femílieleeje mit Burgemeister en Vaeldwachter en hiël völ ándere die mej deeje.

De örste mond vân eur bestaon waore ech neet gemekkelik, te miër umdât verschillende leeje vân de Raod d'n draak probeerden te staeke mit de Vorst, daen gaer hapte.

De örsten tiéd vân 't bestaon moos d'r iedere zôndig nao de Hoëgmis vergaderd waere. Ôp iën vân dees vergaderinge woord de Vorst áfgezatte en goof dizze âs dánk 'n rundje umdât haen vân d'n hiële rotzooi áf waor. Daornao woord de Vorst wer waerem geprot, noom dees betrekking opni-jt aan en goof oét dankbaarheid 2 rundjes. Jaomer genôg haet 't veurzitterschap vân Jan neet zoë hiël lang gedeurd. Beej 'n auto-ongeluk verloor haen hiel ônverwáchs 't laeve.

Wiel Peters mit Jeugdprins Paul Peters (1968)

Mâr 't laeve giët door, de Karnevalsvereniging grui-jde en d'r kwaom völ miër gaeld vreej. De Karnevalsvereniging reep Prinse oét, mit âs örste Príns in 1954 Gerrit I (Gerrit Coenders).

De vereniging kreeg 'n Prinsegarde, bestaonde oét de vrouwelikke haélef vân de Raod vân Ellef. De vereniging kreeg 'n Jeugd-Raod mit Jeugd-Prins en Jeugd-Prinsegarde.

De Karnevalsvereniging "De Keieschiéters" is neet miër oét ôs gemínschap weg te dínke.

Dât dit ok zoë meug blieve!

Ârce Alaaf!

Wiel Peters (1994)