- Beej de grasie vân de Raod vân Ellef.
- Prins vân Ârce, zônder die vân Lômm en Vélde.
- Groëtvors in de Orde vân d'n Ârcese Kei.
- Kommandeur in de Orde vân d'n Hoephap.
- Beschaeremhiër vân 't zwake geslách vân de Cásterojse Schánseknuppels.
- Zoën vân Piet en Elfie Peute en grötse pap vân Sarah.
- Groëtmeister in ’t aldehoore beej ôs prachtige Hertog Jan brouwereej.
- Keurvors beej mien favoriete klub Borussia Mönchengladbach.
- Gouverneur beej vriendegroep “de Oétsmiéters” en ôptochgroep “Zoë Gezág”.
- Burgemeister in ’t rikke ôp dônderdigaovend mit wât vriende.
- Keuning in ’t vogelschete beej ’t Sint Sebastianusgilde.

Alzoë weej in ovverwaeging genaome hebbende, dât 't dinstig is um verordeninge te treffe in 't belang vân ôs ônderdane, gelet ôp artikel ellef vân 't vastenaovesriggelemént, verordene weej en doon te wiëte,

Ten örste: Dât ôs zörrigwoëninge bijna klaor zien deut mich deugd. Ik bin bliej dât dât plan vlot gerealizeerd is gewaore en dât ôs zörrig behoevende Ârcese mínse neet miër ôs daörep hoeve te verlaote.

Ten twedde: Dât 't 6 X 11 jaor geleeje is dât de Boétegeweste zien begoos. Laote we d'r same vör zörrige dât dizzen daag unne moeëjen áfsloéter blief.

Ten derde: Dât ik mich veriërd veul dât ik Príns meug zien in ’t jaor dât we 33 jaor te gast zien beej miene waerikgaever de Hertog Jan Brouwereej en Preuvereej, ôp vriejdig vör de Vastenaovend.

Ten verde: Dât ôs voetbaltrots DEV ovver ’n paar waeke 100 jaor bestiët. Dât ’t groëts gevierd wört is ’n feit en ik wiët zeker dât ’t belke nag lang meug rolle ôp d’n Hôndskámp.

Ten viefde: Dât de pinautomaat oéteindelik ôp de baeste plâts teraech is gekômme, mâr dât ’t wâl liek of ze d'r ’n kermisattraksie vân gemâk hebbe mit die led-verleechting.

Ten zesde: Dât d'r ’n gedege plan vör ôzzen hoëgwaterdiek kump, mâr dât ik haop dât we strakkes nag kunne geneete vân ôs Maas zônder ’n liër te hoeve gebroeke.

Ten zivvende: Dât ’t ôntzettend jaomer is dât nao 70 jaor ’n end kump ân de Gemengde Zangvereniging. Laot ôs haope dât dât gennen trénd wört vör ándere vereniginge.

Ten achste: Dât de subsidies vör diezellefde vereniginge neet minder waere in de toekôms, zoë-dât de kontrebusie vör iederiën betaalbaar blief, en Ârce ’n gezônd verenigingslaeve blief hálde.

Ten niggende: Um tegeliek Keuning én Príns te meuge zien vân Ârce is ôngekend en hiël oétzônderlik. Ik môt mâr good ôplette dât ik ni mit ’t Prínsepak in de Bastianusmis zit…..

Ten tiende: Dât ’t waerik ân de kaerik wâl aerig lang deurt. ’t Begint ’n bietje ôp d’n Dom in Kölle te liéke: dae stiët ok alzelaeve in de steigers.

Ten ellefde: Dât ’t binnekort 75 jaor geleeje is dât Ârce woord bevrijd. Laot ôs dât same groëts viere.

Aldus gegaeve te Ârce 10 jannewarie 2020,
Príns Micha d'n Örste