Op vrijdagavond 4 januari 2008 is Henk Rheiter uitgeroepen als Prins Henk II van de Ârcese Keieschiéters. Henk en zijn dansmarietje Eline (Frissen) zullen ze er een Kei-Toffe Carnaval van gaan maken.

U kunt onze Hoogheden hier feliciteren.

Proclamatie Prins Henk II

Weej, Príns Henk d’n Twedde,

Beej de grasie vân de Raod vân Ellef
Príns vân Ârce, zônder Lômm en Vélde,
Groëtvors in de Orde vân d’n Ârcese Kei
Kommandeur in de Orde vân d’n Hoephap,
Beschaeremhiër vân ’t zwake geslach vân ’t Lômmse Thiëtuitenriék,
Keurvors vân vriendengroep Gen Fatsoén
Groëtmeister in ’t wazele door de mikrofoon,
Ridder in de Orde vân ’t Sintermerteskommiteé,
Kommandeur in de Orde vân de gezelligste straot vân Ârce, d’n Trip,
Groëtvors in de Orde vân de Joekskemissie vân Karnevalsvereniging "de Keieschiéters"
Groëtmeister ôp de middepozisie vân AV Flash hiére 2
en teves groëtmeister in ’t kootsje vân de meide vân sirkulasie 6.
Ridder in de Orde vân de Oudervereniging vân de Wijdtveldschoël,
Beschaeremhiër vân twië prachtige meide, Aniek en Joska,
Groëtvors in de orde vân alle kiénder mit ’n geestelikke en lichamelikke bepaeriking,
Keurvors vân de pléntjes, ’t grás en de bloome in d’n hóf ân d’n Trip.

Alzoë weej in ovverwaeging genaome hebbende, dât ’t dinstig is um verordeninge te treffe in ’t belang vân ôs ônderdane, gelet ôp ’t bepaolde in artikele ellef vân ’t vastenaovesriggelemént, verordene weej en doon te wiëte:

Ten Ôrste:
dât de samevoeging vân de Gemínt Ârce en Vélde mit dieverze gegadigden de gemoodere flink bezig hild is bekend. ’n Heisessie goof d’n doorslaag, ik bin alliën beni-jd of ’t “Einen Tanz auf zwei Hochzeiten” wört of dât de PK/PVDA toch nag eure zin krieg en dât ’t “Wie vân de drie” wört.

Ten Twedde:
dât Príns waere in 2008 ’n kort mâr krachtig verhaal zal waere hof ik oow neet te vertelle. Âs ge wer unne kiër zoë vlot vân unne príns áf wilt zien môt ge wáchte wies 2019. Kei snel mâr toch keisjiek.

Ten Derde:
dât unnen herder duk völ schaöp haet wiëte we allemaol, mâr de kudde vân pastoër van de Ven wört nów wâl aerig groët. Haoplik krieg haen alle schöpkes nag ôp ’t druuëge.

Ten Verde:
dât AV Flash en D.E.V. ÂRCE dit jaor vör ’t örs ân mekaar verbônde zien is neemus ôntgaon. ’n Gôj zaak dât dees vereniginge zieg ôp dees manier kunne ôndersteune en haelepe. In de toekôms zal bliéke of dees vreejazje leidt tot ’n ni-je sport in Ârce, V.V.V. Ârce: Voot Volleybal Vereniging Ârce.

Ten Viefde:
dât ôp ellike pot ’n dekselke paes is ’n bekend gezegde. Klein Vink wört Roëmpot, Maasvallei wört Polepot, de Kersmaert mâr gauw in d’n doëfpot en de Paós en ’t V.V.V.- kantoër ginge in de verdwiénpot. Waak âsteblif vör dees pötjes, want strakkes kân Ârce vör de toeriste de pot ôp.

Ten Zesde:
dât de maert allang ’n M.F.A. is wiëte mâr weinig mínse. Zaes kiër ’n sfeermaert, theaterveustelling ôp de maert, ’n sperjusmaert, ’n herfsmaert en ’n kersmaert. De Keieschieters zien on-lain mit ’n eige sait, mâr ok Ârce kân zônder probleem ôp Maertplâts.nl.

Ten zivvende:
dât “Laot oow us huúre” ’n daverend sukses waor heb geej kunne zeen en huúre. Fillesitasies ân iederiën daen d'r vör gezörrigd haet dât de Ouver….woej hoot '’t ok alwèr, vlot oét de gedáchte vân alle Keieschiéters woord gewist.

Ten Achste:
dât we beni-jd zien naor de PR-kampanje vân Venlo en Haors meug duudelik zien. Ik waarschuw oow vès vör d’n Dreumel mit ’n Jocusmuts ôp. Bliéf kallem, sloét rame en deure, zet de radio aan en wách wies ’t liedje: Weej zien mâr Ârcese keie door de spiékers klinkt. Dân zien we wer veilig.

Ten Niggende:
dât de Kastiëltuine unnen doorstart make is beej allemán bekend. Alle daag vân ’t jaor aope mit hiël völ aantrekkelikke aktiviteite um ’t publiek te vermake. Ze zien zellefs mit de NS in zië gegaon. Nów mâr haope dât de ni-je reistieje ’t treinverkiër naor de kastiëltuine neet te duk laam laet.

Ten Tiende:
dât de prosessie wèr ni-j laeve is ingeblaoze hebbe we gemaerik. Mariabeelde, roëzebledjes, vlage en wímpels, alles woord oét de kás gehaald um ’t fiës te doon slage. Ân ’t end vân de raegenbaog stônd ok heer daen pot góld: unne lekkere pot beer um te klínke ôp ôzze Leeven Hiër.

Ten Ellefde:
smaer de koéte, rek de spiére ôp, want de kômmende veer waeke zal ik âs príns same mit mien dansmarietje Eline d'r vör zörrige dât Karneval 2008 beej alle Ârcese Keie veulbaar aanwezig zal zien. Pak oow ôp en deuj mit ôs mei, want iër-se ’t wets is 't alwèr vörbeej.

Aldus gegaeve te Ârce,
Vastenaovend 2008

Príns Henk d'n Twedde