Op vrijdagavond 8 januari 2010 is Pascal Peeters uitgeroepen als Prins Pascal I van de Ârcese Keieschiéters. Zijn dansmarietje was Suzanne (van den Kroonenberg).

Weej, Príns Pascal I,

Beej de grasie vân de Raod vân Ellef
Príns vân Ârce, zônder Lômm en Vélde,
Groëtvors in de Orde vân d’n Ârcese Kei
Kommandeur in de Orde vân d’n Hoephap,
Beschaeremhiër vân ’t zwake geslach vân ovver de paöl,
Ridder in de Orde vân de Maliebaan,
Keurvors in ’t regele vân cénte vör ôs aller DEV,
Maarschalk in ’t rôndjakkere mit ôs áld vollikswagebuske,
Kommandeur in ’t verkoëpe vân vân alles en nag wât,
mâr vörál koffie, spriet, petatte, grunte en fruit.
Steunpilaar vân hiël völ Ârcese vereniginge,
Zoën vân Príns Hay III en Elly vân ’t Kuluteriék.
Ridder in de Orde vân vrindegroep “schrik zât”,
Goeverneur in ’t regele vân bestuurszake en buurtfiëste,
Groëtvors in de Orde vân de bizznizzklup Eugenia en Salvo,
Hofmeister in ’t neet goeëje vân 180 in de bedriéfskompetisie,
Kommandeur in de Orde vân de Alde Gild,
Biëstig grötse vader vân de Kiezelstiëntjes Niels en Youri.

Alzoë weej in ovverwaeging genaome hebbende, dât ’t dinstig is um verordeninge te treffe in ’t belang vân ôs ônderdane, gelet ôp ’t bepaolde in artikel ellef vân ’t vastenaovesriggelemént, verordene weej en doon te wiëte.

Ten örste:
dât de gemínte Venlo beej völ hôndebezitters de gebeten hônd is, vânwaege de hôndebelastingkontraole. Nów is ’t vân allen tiéd dât hôndeliefhebbers en gemíntes âs kat en hônd laeve, mâr iën ding is duudelik: Venlo haet zien tand laote zeen.

Ten twedde:
dât zoëwâl DEV âs Jông Ârce groëte bouwplanne hebbe. Ik haop vör alle twië de vereniginge dât ze eur planne waor zulle make en mei daordoor mit name ôs jeugd nag miër kunne bieje âs dât ze nów al doon.

Ten derde:
dât ’t MFA vör völ ôpschudding zörrigt. Veur- en taegestanders staon liénraech teggenovver mekaar. Ik haop in ieder geval wâl dât, âs ’t gebouw strakkes stiët, waor dân ok, iederiën in ôs daörep wâl mit elkaar door iën deur kân.

Ten verde:
gezeen de interesse vör de moeïje eksposisie ovver 208 jaor Ârce, Lômm en Vélde, môtte weej misschien gaon dínke ân ’n muzeum. Ôs Gemíntehoés zuj daor ’n prachtige lokasie vör kunne zien. En ’t maés sni-jt ân twië kánte: ôs geschiedenis good bewaard en ’n ni-je toeristiese attraksie.

Ten viefde:
dât de data 30 jannewarie 1987 en 8 jannewarie 2010 mit hoofletters beej geschreve zulle waere in de geschiedenisbeuk vân de Sproeiers.
Príns Hay III en Príns Pascal I, zoë-âs de alde zônge, piépe de jônge.

Ten zesde:
dât ônder ’t mom vân de verkiërsveiligheid de kermis verplâts is nao ’t Kaerikplein. Mâr völ Ârcenare mende dât dât neet de waore reeje waor. Woei ’t ok is, de kommunikasie naor de betrokkenen verdinde in ieders geval neet d’n hoofpriés.

Ten zivvende:
dât de reis door d’n tiéd, ôs aangebaoje door de Gemingde Zangvereniging d'r iën waor um in te lieste. Mien kompeleménte vör de bedínkers en alle oétveurenden. Absoluut vör herhaling vatbaar.

Ten achste:
dât d'r tusse Roland en ’t Aegelder flínk ân de waeg wört getummerd en dât ’t gelukkig al behuuërlik ôpschuut. Ik vertrouw d'r ôp dât âs ’t strakkes gáns klaor is, ’t wer gewoën unne waeg is in plâts vân de reesbaan die ze waor.

Ten niggende:
dât ’t kaerikplein moeëj is ôpgeknap. En ok ’t thiëhoés in de door ôs zoëvöl bezônge Inaborg is prachtig gewaore. ’n Prima inisiatief vân de stichting het Limburgs Landschap dât lof en waardering verdint.

Ten tiende:
dât we middels ’n geweldig ôptraeje ôp de maert en ’n schitterend konsert in de Maaspaort afscheid hebbe genaome vân de geminte Ârce en Vélde en we nów beej groët Venlo huúre. Mâr ik haop en vertrouw d'r ôp dât weej d'r mit allemán vör zörrige dât Ârce Ârce zal bliéve.

Ten ellefde:
al kaos ’t mich mien letste krach, ik zal d'r alles ân doon um unne keitoffe Príns te zien. Mit de ôndersteuning vân mien Dansmarietje Suzanne, mien gezin en miene vriendegroep “Schrik zât” môt ’t lukke um d'r vör alle Keieschiéters en Keieschiéterinnekes unne fantastiese Vastenaovend vân te make.

Aldus gegaeve te Ârce,
Vastenaovend 2010.

Príns Pascal d’n Örste

Proclamatie Prins Pacal I