In herinnering: Riet Fleuren-Drissen

’n Trouw lid vân Karnevalsvereniging "de Keieschiéters" is neet mieër.

Riet is in 1973 beej de vereniging gekômme en ze begoos eur lange lidmaotschap beej de kiénderkarneval. In 1990 stapte ze aover nao de zaalkemissie en heej verzörrigde ze tiédes de generale rippetisies steeds trouw d’n tap. ’t Koos neet oétbliéve: Riet stapte in 2001 aover nao de horecakemmissie. Heej vulde Riet zich âs unne vis in ’t water. De horecakemissie koos ziech gen baeter lid veurstelle. Naeve de nuuëdige spéldjes en ônderschei-jinge vör de jubilea die ze meugde ôntvange, woord Riet in 1992 benump tot Officier in de orde vân d’n Ârcese Kei en beej eur 33-jaörig jubileum woord ze Lid van Verdinste en meugde ze de BCL ônderschei-jing ôntvange. In 2007 kreeg Riet vör eur verdinste vör de gánse gemínschap vân de vereniging d’n Bônten Hoephap oétgereikt. Beej eur 4x11 jaörig jubileum kreeg Riet ’n persoënsgebônde aandínke. Nag tot vörrig jaor haet ze áltiéd mit eure mán Twan en eur schoeënzeuster Marij de bruuëdjes gesmaerd vör alle artieste vân de zittinge en ’t geüniformiërde gediëlte. Beej de leejevergaderinge kooste we ôs gen trouwer lid bedínke. Âs ze koos waor ze same mit Twan áltiéd trouw aanwezig.

Riet is gestorve ôp 3 jannewari 2021.

Riet hieël aerig bedánkt vör diene groeëten inzet en wâs-se haes beteikend vör de Keieschiéters.